Raqamli savodxonlik va innovatsion texnologiyalarni joriy etish

Raqamli savodxonlik va innovatsion texnologiyalarni joriy etish boshqarmasi ta’lim tizimida raqamli savodxonlikni rivojlantirish, ilg‘or innovatsion texnologiyalarni joriy etish hamda raqamli yechimlar asosida o‘qitish jarayonining samaradorligi va boshqaruv tizimini takomillashtirishga oid ilmiy-uslubiy faoliyatni amalga oshiruvchi mustaqil tarkibiy bo‘linma hisoblanadi.

Boshqarmada quyidagi bo‘limlar mavjud:

– Raqamli pedagogika va mediata’limni rivojlantirish bo‘limi;

– Raqamli texnologiyalar va innovatsiyalarni joriy etish bo‘limi.

Boshqarmaning asosiy vazifalari:

– ta’lim tizimida raqamli savodxonlikni oshirish va ta’lim ishtirokchilarining raqamli kompetensiyalarini rivojlantirishga qaratilgan dasturlar, loyihalar hamda metodik materiallarni ishlab chiqish va joriy etish;

– raqamli pedagogika, mediata’lim va zamonaviy o‘qitish texnologiyalarini ta’lim jarayoniga integratsiya qilish, ilg‘or xorijiy tajribalarni milliy sharoitga moslashtirish;

– ta’lim jarayonida sun’iy intellekt, virtual va kengaytirilgan reallik, simulyatorlar, interfaol platformalar va boshqa innovatsion texnologiyalardan foydalanish tizimini shakllantirish;

– maktabgacha va maktab ta’limi muassasalari uchun raqamli o‘quv kontentlari, video darslar, interfaol mashg‘ulotlar, multimedia resurslari va o‘quv platformalarini yaratish bo‘yicha ishlarni tashkil etish;

– ta’lim muassasalari faoliyatida innovatsion yechimlar hamda raqamli boshqaruv mexanizmlarini joriy etish, ularning samaradorligini oshirish yuzasidan tavsiyalar ishlab chiqish;

– raqamli ta’lim platformalari, ma’lumotlar bazalari va o‘quv jarayonini boshqarish tizimlarini joriy etish hamda ular bo‘yicha ilmiy-uslubiy tadqiqotlar olib borish;

– pedagoglarning raqamli kompetensiyalarini rivojlantirishga doir qisqa muddatli malaka oshirish kurslari uchun kontent va metodik materiallar tayyorlash;

– ta’lim tizimida innovatsion faoliyatni rivojlantirish, ilg‘or texnologiyalarni tajriba-sinovdan o‘tkazish va ularni amaliyotga joriy etish;

– raqamli ta’lim, mediata’lim va innovatsiyalar yo‘nalishida tahliliy hamda ilmiy-amaliy tadqiqotlar o‘tkazish, strategik taklif va tavsiyalar ishlab chiqish;

– xalqaro tashkilotlar, donorlar va texnologik kompaniyalar bilan hamkorlikda raqamli ta’lim va innovatsion texnologiyalarni joriy etish bo‘yicha qo‘shma dastur va loyihalarni amalga oshirish.